Paribasa
Bali
A. Pamiteges
Paribasa Bali
Paribasa Bali inggih punika rerasmen
basa pinaka panglengut bebaosan
utawi gegonjakan sane kanggen piranti
ngwedar daging pikayunan, nganggen imba-imba .Kawentenan paribasa Baline
ngranjing ring susastra tutur ‘lisan’,
rauh mangkin kantun maurip ring pambyaran,sakewanten pungkuran sampun akeh sane
kasurat mawangun stensilin miwah cetakan. Ketut Ginarsa (1985) maosang nganggen
murda Paribasa Bali sane kamedalang
antuk Balai Penelitian Bahasa Singaraja. Wayan Simpen, A.B (1982) maosang
nganggen murid Bhasita Paribasa,
kamedalang antuk PT Mabakti Denpasar, Nengah Tinggen (1988) nganggen murda Aneka Rupa Paribasa Bali,kamedalang
antuk Percetakan Rhika Dewata Singaraja.Ring sor puniki wenten conto lan pangertian
Paribasa bali inggih punika:
1.
Sesenggakan
Sesenggakan wit saking kruna “senggak”,
kaduwipurwayang dados sesenggak,polih pangiring-an dados
sesenggakan.
Sesenggakan puniki taler sakadi palambang utawi sesimbing kahanan utawi polah
jadma sane kaimbangang ring kahanan miwah polah barang utawi buron. Binanipun
ring sesonggan , yening sesenggakan nganggen piranti kruna kadi,buka utawi luir.
Conto
sesenggakan inggih punika:
1. Buka sandate di teba, bungane alap
punyane kiladin
Suksmanipun, sakadi anak lanang ngambil anak istri,
nanging matuannyane tan kalinguang.
2. Buka negen tambahe baatan kori
Suksmanipun, sakadi
anake ngambilan pakaryan , ring pangawitnyane dangan, nanging kasuen-suen
ipun manggihin pakewuh.
3. Buka
makpak tebune, ampsne kutang, suksmanipun : Sakadi anake sane makurenan, ring
kantun pangantenan, kalih sasuenne
kantun bajang kasayangang tur kajungjung, risampune tua tan mampuh kakutang.
4. Buka gowake ngadanin ibane.
suksmanipun : sekadi anak corah sane nuturang kacorahan padidi
5. Buka
naar krupuke, gedenan kroakan, suksmanipun : Sakadi
anake sane ngaku wanen kalih jaga muputuang karya, sakewanten nenten wenten
buktinipun nglaksanayang.
6.
Buka ngenjekin ikut cicinge, mabalik nyaplok, suksmanipun : Sakadi i bapa ngenken i pianak ngrereh napi-napi,
raris i pianak mabalik ngenken bapanipune ngerereh punika. Buka payane
disisi maukir, ditengahne masumbe : sekadi anak matiosan laksana teken munyine
7.
Buka lindunge uyahin, blangsah,
suksmanipun : Sakadi
anake sane uyang paling nenten uning-uning nongos.Buka katake matindik salah
genah : sekadi anake ngangge pepayasan tan nganutin dewek ipun.
8.
Buka macane, nakutin lawat,
suksmanipun : Sakadi
anake sane marasa ring dewekipune iwang wiadin corah, setata ipun mrasa congah
wiadin takut tur kabilbil.Buka sumangahe ngugut kanti mati : anake sane
nganutin manah ipun, yadiastun ipun padem
9.
Buka macane, ngengkebang kuku,
suksmanipun : Sakadi
anake sane pradnyan (wikan), ngengkebang kepradnyanan (kawikanan).
10.
Buka bukite ejohin, katon ngrawit; suksemanipun : sakadi anake pakantenan ipun saking doh jegeg utawi
bagus, kewanten wawu tampek tlektekang ipun bodo, muanipune burik.
2.
Sesonggan
Sesonggan wit saking kruna “ungguh”, sane mateges linggih ,
genah, tongos. Kruna ungguh polih pangiring
-an dados ungguhan; polih pangater sa- dados saungguan utawi songgan,
raris kaduipurwayang dados sesonggan. Sesonggan inggih punika palambang kahanan
kalih polah jadma sane kaimbangang ring kahanan miwah polah barang utawi
buron.Ring sor puniki pinaka conto Sesonggan:
1.
Berag-beragan gajahe nu masih ada mulukne.
Suksmanipun, Satiwas-tiwas
anake sane pecak sugih , janten kantun wenten paderbenipune.
2.
Lelipi ngalih gegitik.
Suksmanipun,
Sakadi malinge, ipun nuturang dewekipune mamaling mawinan keni tangkep polisi.
3.
Katanjung di mata, suksmanipun, sakadi ring anake sane marasa ring dewek iwang ring timpal, raris
matemu ring timpalipune punika, mawinan ipun kimud tur kabilbil.
4.
Degag delem, suksmanipun,
kaucapang
ring anake sane degag, ring genahe suung ipun ngapak-ngapak ngaku wanen,
sakewanten yening sampun wenten musuh ipun ajerih, makiles mlaib.
5.
Duk masanding api, suksmanipun, sakadi anake sane mamusuh-musuhan raris ganahipun
matampekan, iwang akidik janten dados rebat/uyut/iyeg.
6.
Payuk
prungpung misi berem, suksemanipun, pakantenan umah ipune brengbeng, kawenten sejeroning
umahipune bersih tur bek madaging barang-barang sane becik-becik (disisine
jelek ditengahne luung)
7.
Ada andus ada apine, suksmanipun,yening wenten orti ala wiadin ayu,
sinah wenten sane jati (pasaja), diastun ipun akidik.
8.
Buta tumben kedat, suksmanipun
, sakadi
anake sane pecak tiwas, kasuen raris ipun sugih, pramangkin ipun sombong, ngagu
tur jerbu ring timpal miwah nyama braya.
9.
Gede ombake gede angine, suksmanipun,
ageng
pikolih utawi asil anake, janten ageng taler penelasipun.
10.
Kamus majalan, suksmanipun
, kaucapang
ring anake sane pradnyan tur sampun weruh ring makudang-kudang basa.
3.
Sesawangan
Paribasa sane mawasta sesawangan, wantah bebaosan sane
kaanggen pinaka pangrumrum. Wenten sane kaanggen ngajum-ajum, taler wenten
kaanggen mintonin utawi nyacad, mawinan sang katiben bebaosan pacing seneng
utawi gedeg miwah jengah. Sesawangan puniki sering taler nganggen kruna kadi,
buka,
miwah luir. Ring sor wenten conto sesawangan inggih punika:
1. Batisne lantang kadi batis
cangak, Suksmanipun,kanggen nyacad anak sane landung , utawi anak sane madue
batis lantang
2. Romanne selem kadi manggis,
Suksmanipun, kanggen nyacad ring anake sane madue kulit selem nanging
yening makenyem, manis pisan.
3.
Bokne gading kadi bok jagung, Suksmanipun,kaucapang ring anake sane madue bok sane mawarna gading,sekadi
bok jagung.
4. Matane ngonjol kadi mata kidang, Suksmanipun, kaanggen nyacad ring anake
sane madue panyingakan gede.
5. Alisne nyurarit kadi don intaran, Suksmanipun,
kaucapang ring anake sane madue alis alus pisan nyurarit buka
don intaran.
6. Muane kadi bulan purnama, Suksmanipun, kaucapng
ring anake sane madue mua (muka/wajah) bunter sekadi
bulan purnamane.
7. Bangkiangne rengkiang acekel gona layu, Suksmanipun, kaucapang ring anake berag,sane madue bangkiang
alus pisan (langsing).
8.
Nyonyone kadi nyuh gading kembar, Suksmanipun, kaucapang ring anake sane madue susu putih gading
sakadi nyuh gading kembar.
9. Seledetanne kadi tatit, Suksmanipun, kaucapang
ring anake sane madue sledet galak sakadi tatit, biasane
kaucapang ring anake seneng maigelan.
10. Raosne galak kadi cicing
borosan, Suksmanipun, kaucapang ring anake sane demen mesaut galak utawi
bangras.
4.
Sesawen
Sesawen mawiwit saking kruna sawi
sane mateges tanda utawi praciri. Raris
kruna punika kadwipurwayang saha polih pangiring – an dados sesawen.
Sesawen,
kasinahang antuk barang utawi gambar sane maderbe tetujon utawi tetuek midartayang, satmaka ipun bisa
ngraos kadi tanda lampu lalu lintas.
Conto
Sesawen inggih punika:
1. Ngenahang patakut marupa jadma
ring carik, kanggen sarana ngulah kedis.
2. Ngantungang pongpongan mabolong
tiga ring duur jelanan kandang ayam , sane matetujon nulakin grubug ayam.
3. Wenten anak nandur kelapa saha ngandong
anak alit tetiga. Puniki matetuek mangda entik kelapane kuat saha pacang mawoh
nged.
4. Anak istri ka pura mapusung
gonjer. Puniki sesawen anake istri punika kari bajang.
5. Kulit endog ayam katusuk antuk
lidi raris muncuknyane kadagingin tabia. Puniki ciri maderbe pitik , saha
matetujon mangda pitike nenten kasander kilap.
6. Don ambu makeset, ka gantungang
ring punyan-punyanan, puniki maciri sampun nyambut galungan istilah nyane
nyawenin punyan-punyanan.
7. Bawang ka pakpak lan kasimbuhang
ring pasirepan anak cerik, Puniki maciri anak sane madue anak alit,nyimbuhang
bawang pangten anake cerik manying utawi ngeling lan kagugulin anak di peteng.
8. Bawang ka tusuk baan tiuk lan
kagenahang ring muncuk tiuke, kaabe ideh-ideh rikala masiram utawi sane lianan.
Puniki kabakta ring anake sane wawu madue anak alit sakadi pasikepan.
9. Anak ngalih oong anggen jukut di
ngalihne suryak-suryak, puniki matetujon apang oonge buin tumbuh liu.
10. Anak alit sane sirep di sampingne
kagenahin sampat lidi, puniki matetujon nimpalin anak alit sirep lan ten wenten
sane ngugulin.
5.
Sesapan
Sesapan mawit saking kruna sapa sane kadwipurwayang saha polih
pangiring -an dados sesapan. Sesapan mateges baos nyapa utawi nyangra sane
matetuek nunas karahajengan ring Ida Sang Hyang Widhi Wasa. Sesapan sane
kawedar seringan nganggen bebaosan sane banban alon lan alus. Conto:
1. Sesapan anak tengkejut mirengang
krebek kuug:
“Kaki, kaki bentuyung, eda kesiabina tiang, tiang cucun kakine”.
2. Sesapan anak jagi luas ngajak rare, nyolekang adeng
ring gidat rarene: “Ratu Hyang Brahma, titian nunas sasikepan mangda raren
titiange rahajeng”
3. Sesapan anak mirengang suaran
cekcek ri kala mabebaosan.
4.
“Singgihan Saraswati”.
5.
Sesapan
ngebah taru : "Ratu Betara Sangkara, titiang nglungsur taru druene, mangda
titiang nenten tulah."
6.
Sesapan suara kedis caak : "Kakasang ngengsut di ambune."
7.
Sesapan
sabeh bales : "Kaki-kaki bentuyung sampunang kasiabange titiang, tiang
cucun kakine."
8.
Sesapan
ngentasin genah tenget : "Jero sane nuenang genahe/margine, tiang nyelang
genahe icen tiang karahajengan."
9.
Sesapan ri
kala sungkan, wenten dongkan mamunyi : "Ih, apa not iba yening ada anak
makeneh rahayu, mai, sakewala yening tusing rahayu bakal cotot matane apang kanti
buta.
10.
Sesapan
angin baret, angin nglinus : "Ratu Betara Bayu sampunang nglintangi riki,
santukan titiang akeh madue anak alit."
6.
Wewangsalan
Wewangsalan
puniki pateh sakadi tamsil ring Bahasa Indonesia. Wewangsalan kruna lingganipun
"wangsal" sane artinipun "lampah", polih pangiring
"an" dados "wangsalan", kaduipurwayang dados
"wewangsalan", artinipun lelampahan saparipolah kalih kahanan jatma.
Wewangsalan puniki kawangun antuk angkepan kruna kalih carik, carik kaping 1 pinaka giing, carik kaping 2 pinaka isi, daging, utawi suksmanipun.
Wewangsalan puniki kawangun antuk angkepan kruna kalih carik, carik kaping 1 pinaka giing, carik kaping 2 pinaka isi, daging, utawi suksmanipun.
Ring sor puniki wenten
makudang-kudang wewangsalan luiripun :
- Asep menyan majagau, suksmanipun : nakep lenggar aji kau
- Ada tengeh masui kaput, suksmanipun : ade keneh mamunyi takut
- Bakat kocok misi isen, suksmanipun : awak bocok tuara ngasen
- Bangbang dadua ken ceburin, suksmanipun : bajang dadua ken anggurin
- Be lele mawadah kau, suksmanipun : suba jele mara tau
- Bedeg majemuh bangsing di banjar, suksmanipun : jegeg buin lemuh langsing lanjar
- Baju gadang potongan gantut, suksmanipun : tuyuh magadang tuara maan entut.
- Buah sabo mawadah klukuh, suksmanipun : awak bodo buin angkuh
- Celebingkah beten biu, suksmanipun : gumi linggah ajak liu
- Gamongan kladi jae, suksmanipun : omongan dadi gae
7.
Cecangkikan
Cangkikan puniki masaih ring raos ngempelin , maderbe arti
ngintar, kanggen magonjakan utawi
melog-melog anak. Conto:
1.
Yen di Karangasem, tain cicing
dengdeng goring jaen. tegesipun: nenten wenten anak ngoreng tain cicing, yening
ulam dengdenge goring janten jaen
2.
Padange tusing dadi arit, tegesipun:Padange sinah nenten sida
dados arit, Yening padange abas antuk arit janten dados.
3.
Anake negen tumbak tusing dadi, tegesipun: Yening anake rikala negen
napi-napi raris tumbak, janten nenten dados, Kewanten yening anak makta tumbak
tegena punika dados.
4.
Rumus hitungane makejang sukeh, nanging
jalanne makejang tawang,tegesipun:
Yening rumus hitungane wiakti sulit (tan kauningin), kewanten jalanne (rurunge)
sami kauningin, yening jalan hitungane nenten kauningin.
5.
Kapal melabuh madelod, ngenah badajanne, tegesipun: Yening cingakin kapale saking
kaler, sinah sisin kapale balerne sane kanten.
6.
Ia gelem antudne tusing dadai jalananga, tegesipun: Yening entude sinah nenten
dados jalanang, sane kajalanang batis, boya ja entud.
7.
Tiang suba lepas uli sekolah, tegesipun:. Ipun nglepasin sekolah
artine nenten masekolah.
8.
Kompek matali gandek, tegesipun: Yening kompeke sane matali
nika mawasta gandek.
9.
Beh, kakolongane tusing dadi gelekang, tegesipun: Kakolongane sinah nenten
dados gelekang, kewanten yening ajeng-ajengan janten dados gelekang.
10. Awak
suba bajang enu masih manyonyo, tegesipun: Makasami anake madue nyonyo, boya
ja nyeseo nyonyo sakadi anak rare.
8.
Cecangkriman
Cangkriman maderbe suksma matebag-tebagan sakadi
macecimpedan. Conto :
1.
Berag landung , ngelah panak cerik
liu, memene slelegang, panakne jejek menek tuun, memene gelut gisiang. Punika
cawisane Jan.
2.
Maumah dialas agung,bungkut
panadege,awake mabulu pipis,pawah cakluk, layahe selep-sepang. Punika cawisane Klesih.
3.
Awak bunter maretungtung, basangne
anginan, yen paek ye ninjakin,uber kepung, I kaki incang-incangang. Punika
cawisane Bola.
4.
Rurung buntu,tan masepak nolor terus,nyen
makeneh mentas,apang elahan agigis,musti blenggu,majalan ditu magaang. Punika
cawisane Anak menek punyah nyuh nganggon slingkad.
5.
Nyerukut,majempong ya biana senggu,
masiksik dong naga, matapuk ya boya manggis, tur macunguh, nanging tusing biasa
ngungas. Punika cawisane Buah manas.
9.
Cecimpedan
Cecimpedan puniki wantah bebaosan kaanggen matebag-tebagan,pateh kadi syair
teka-tekiring Bahasa Indonesia.Cecirin cecimpedan nganggen pitaken ; Ape ke…?
Utawi Padik, apa…?
Conto:
1.
Apa ke, ngamah uli basing meju uli
tundun?
Cawisane, Panyerutan
2.
Padik apa,Jangkrik ngecik duur
gununge?
Cawisane, Anak
Macukur.
3.
Padik apa, di cenikne dupdupang, di
gedene matiang?
Cawisane, Api
4.
Apa ke bilang tolih
ngejoh-ngejohang?
Cawisane, Kuping
5.
Padik apa, ngamah acepok betek
sesai?
Cawisane, Galeng
6. Apa dituunne mekelo, dimenekne
enggal? (tenges)
7. Apa tai belek megantung?
Cawisan,Juwet
8. Apa anak cenik maid cacing?
Cawisane,Benang
9. Apa anak cenik ngemu getih?
Cawisane, Klepon
10. Apa sabilang pecuk kajengit?
Cawisane,Ceretan
10.
Raos Ngempelin
Raos ngempelin mawangun kruna-kruna sane dempet .
Kruna-kruna sane asiki madue teges kekalih, sane siki madaging arti sejati,
sane malih asiki maarti ngintar. Conto:
1.
Lamun payu motonan, beli ja nyelengin.
Suksmanipun, teges 1: ninggalin sambil nyelengan, teges 2:
ngemang celeng.
2.
Yang nguangun arja, tiang ngaluhin, tegesipun: 1. Dadi galuh, 2. Ngaluhin + juru
aluh (nongos).
3.
Damar bedauh, mati kanginan, tegesipun: 1. Kanginan = genah ipun
medangin, 2. kanginan = tempuh angin.
4.
Mamula kacang badaja, mentikne nglodlodang, tegesipun: 1. Nglodlodang =
entikipun madlodlod, 2. Nglodlodang = sayan ngelodang.
5.
Ring dija palungane mangkin?, tegesipun: 1. Palungane = jaga lunga, 2.
Palungane = pangamahan bawi.
6.
Napi kalih ditu?, tegesipun:
1. Kalih = dadua, 2. Kalih = ka alih.
7.
Ia madagang kamulanne suba telah, tegesipun: 1. Kamulane telah = sanggah
kamulane kedas, 2. Kamulane telah = pokok dagangene sampun telas (rugi).
8.
Ida dimantuke simpang di pura, tegesipun: 1. Dimantuke = dawegne mantuk
(budal), 2. Dimantuke = diman tuke.
9.
Madaarsanan malu dini, tegesipun: 1. Daar sanan = pesan madaar
dini, 2. daar sanan = naar sanan.
10. Benang
kamene, jaka di pangkunge, tegesipun: 1. Kamen antuk benang, jaka mentik di pangkunge, 2.
Benang kamenen, ajaka di pangkunge
11. Bebladbadan
Bebladbadan punika wantah silih sinunggil Basa
Basitha sane lumrah kaanggen ring Basa
Bali. Ring sor puniki wenten makudang-kudang conto bebladbadan , luiripune :
1. Maberuk tanah ,arti sujatine: caratan, arti paribasane : nyaratang
2. Mabawang putih , arti sujatine :
kesuna, arti paribasane : pisuna
3. Macarang nyuh , arti sujatine: papah, arti paribasane: ngepah
4. Maceleng lua , arti sujatine: bangkung , ati paribasane : bengkung
5. Madanyuh biu , arti sujatine: kraras, arti paribasane : raras dogen
6. Madamar bangke
, arti sujatine:angenan, arti paribasane : mapangenan
7. Madamar di
carik , arti sujatine: kunang-kunang,
arti paribasane : tunangan
8. Maadin kuud , arti sujatine: klungah, arti paribasane: jengah
9. Ental magulung , arti sujatine: subeng, arti paribasane : nyebeng
10. Gedebong tuh , arti sujatine: kupas, arti paribasane : upas
12.
Peparikan
Peparikan pateh ring pantun
sajeroning basa Indonesia. Parikan kawangun antuk lengkara petang carik , carik
kaping 1 lan 2 pinaka giing, carik kaping 3 lan 4 pinaka daging utawi
suksmanipun.
Conto:
1. Balang minyak balang mamedi,
Balang
kaja mawadah lumur.
Lamun
nyak jalan malali,
tusing
joh teked di sanur.
2. Kaden poh kuning-kuning
Anak
manas ko mepelut
Kaden
boh kenying-kenying
Anak
rengas buin celut
3.
Ngalap
wani ngaba bawang
Ngalap manggis empes-empesin
Anak jani tuara tawang
Ulat manis mamanesin
4.
Bangsing
di banjar
Bedeg mejemuh di baleran
Langsing buin lanjar
Jegeg buin lemuh
maguleran
5.
Clebingkah
beten biu
Belahan pane blahan paso
Gumi linggah ajak liu
Ada kene ada keto
13.
Tetingkesan
Tetingkesan
wit saking kruna tingkes sane mateges ringkes, kadwipurwayang saha polih
pangiring –an. Dados tetingkesan. Dadosipun tetingkesan mateges
baos sane karingkes ngandapang raga utawi baos ngandap kasor.
Upami:
1. Mai madaar ka paon kanggoang nasi ken uyah
keres!
2. Kanggoang singgah polos nah, sing
maan ngidih apa!
3. Lugrayang titiang nunas ampura
riantuk genah titiange kaon pisan!
4. Kanggoang nah umah uwug, tongos
negak sing ja ada!
5. Bapa belog anggon Cening rerama,
kadirasa liwat jlinjingan sing ja taen.
6. Lugrayang titiang nunas ampura riantuk
genah titiange kaon pisan!
7. Kanggoang nah umah
cenik, tongos negak sing je ada!
8. Ampura ratu titian kamulan panjak
kaliantang tambet!
9. Aksamang ukudan bapane, bapa belog
anggon cening rerama!
10. Dini luh ngayahin I Beli Made,
kanggoang metapa lacur
suksma sampun ngwacen blog titiang, yening wenten sane kirang, titiang nunas sinampura..
Tidak ada komentar:
Posting Komentar